اوچونجو: بیر یئر كی اؤلولوكدن سونرا آبادلاشا، آبادلایانین مولكو ساییلار. بو یئر احیاء بابیندا ذیكر اولان شرطلرله اونون مولكو اولار (مثلاً حاصارا سالسین، آبادلادیغی یئر مسجید یئری اولماسین و ساییر) بعضی‌لری دئییبلر اومّت بونا ایجماع ائدیب، نئجه‌كی «مهذّب» بئله ایدعا ائدیب. بعضی‌لری دئییب موسلمانلار بونا ایجماع ائدیب، نئجه كی «تنقیح»‌ده وار و «تذكرة» ده یازیب كی «امصار» فقیهلری بو عقیده‌ده‌دیلر. لاكین نظریمه گلن بودور كی شیخ طوسی‌نین كلامیندا بئله گلیب كی بو شراییطده فقط تصرّوف ائده بیلر، یوخسا اونون مولكو اولا بیلمز. پس گرك باخیلا.

دؤردونجو: او یئر كی آبادلیقدان سونرا اؤلو اولا. پس آبادلیغی اصلی اولسا یعنی اوّلدن (بونسوز كی اورانی بیری آباد ائده) آباد اولا، اورا ایمام مالیدیر. آما آبادلیق بیر شخصین الی ایله اولورسا، بو مسأله كی همن یئر قاباقجا اونو آبادلایان شخصین مولكیّتینده قالسین و یا اونون مولكیّتیندن چیخیب ایكینجی آبادلایانین مولكو اولسون، مشهور بیر ایختیلاف وار كی احیاءالموات كیتابیندا وار. بو ایختیلافین منبعی و قایناغی خبرلرین ایختیلافیدیر. بعضی خبرلر دئییر كی قاباقجادان آباد ائدنین مولكودور و بعضی‌لری دئییر كی یوخ، هر كیم سونرادان آبادلاییب، اونون مولكو ساییلیر.

سونرا، یئرین اوچونجو قیسمینده (اؤلولوكدن سونرا آبادلانیب) بیر حالت وار كی بو یئرین آبادلیغی موسلمان طرفیندن اولا و یا كافیر طرفیندن اولا. پس آبادلایان موسلمانلاردان اولورسا، اونون مولكیّتی زاییل اولماز مگر بو كی اینتیقال وئره و یا ایكی قوولدان بیرینه گؤره سونرادان خرابلیق و اؤلولوك عاریض اولا. و یئری آبادلایان شخص كافیرلردن اولورسا یئنه همن جوردور. یعنی اونون مولكو اولار مگر بو كی اینتیقال وئره و ساییر. و بو، او شراییطده‌دیر كی موسلمانلیغی آبادلایانا شرط قویمایاق. آما موسلمانلیغی شرط بیلرسك ایمامین مولكیّتینده قالار. (بو او شراییطده‌دیر كی یئر ایسلام تورپاغیندا اولا) آما یئر كافیرلر تورپاغیندا اولورسا، یئرین مولكیّتی اونون اولار و مالكیّتی ایكی دورومدا آرادان گئدر:

1. موسلمانین مالكیتی زاییل اولان كیمی (1. اینتیقال 2. ایكی قولدان بیرینه گؤره خرابلیقدان سونرا)
2. اؤ بیری ماللاری كیمی غنیمت اثرینده.