بلی شئیخین تهذیبده‌كی عیبارتیندن ظاهیر اولور كی رقبه‌نین اؤزونده بیع و شراء جاییزدیر. اوردا دئییر: «بیر نفر بیزه (شئیخ طوسی‌یه) ایشكال چیخاردیرسا كی سیز ذیكر ائدن زاد بو ایكی یئرده فقط تصرّوف ائتمگی موباح ائدیر و بونا دلالت ائله‌ییر كی شراء و بیع بو یئرلر باره‌سینده دوز اولسون. پس اونون تصرّوفو بیع و شراء ایله دوز اولماسا، شراء و بیعه موتفریع اولانلار دا بوردا موتفریع اولمازلار. اوندا بیز (شئیخ طوسی) بئله دئیَریك: بیز یئری اوچ یئره بؤلدوك:

1-     او یئر كی اونون جماعتی موسلمانلیغی قبول ائده، پس او یئر اونلاریندیر و اوندا تصرّوف ائدیرلر.

2-     او یئر كی عنوه و غلبه ایله آلینیب.

3-     او یئر كی اونون جماعتی او یئرله موصالیحه ائدیبلر (مثلاً دئییبلر كی یئر سیزین اولسون و بیزی آزاد بوراخین گئدك)

بیز بو ایكینجی و اوچونجو یئرلرین شراء و بیعینی موباح بیلیریك. چونكی بیزیم‌ده بو یئرده سهمیمیز وار. چونكی بورا موسلمانلار اراضیسیدیر و بیز ده موسلمانیق. و هابئله بو قیسمده (غلبه و یا موصالیحه‌ایله آلینان یئرلرده) شراء و بیع صحیحدیر، بو باخیمدان كی غلبه و یا موصالیحه ایله آلینیب. آما انفال و اونون مجراسیندا جاری اولانلاری، شراء ایله تملّوك ائتمك اولماز و بیزه فقط اوندا تصرّوف ائتمك موباحدیر.

سونرا شئیخ طوسی خراج یئرلرینده ابی‌برده‌نین ریوایتینه ایستیدلال ائدیب [كی بیعی جاییزدیر] و قاباقلیقدا اوخودوق. او ریوایت بونا دلالت ائدیردی كی تصرّوفدن تؤره‌نن آثارین بیعی جاییزدیر آما یئرین رقبه‌سی‌نین بیعی یوخ.

و شئیخ طوسی‌نین دلیلی، اونون كلامینی تأیید ائتمگه قرینه‌دیر.