لاكین حقیقتده بو معنا مالیكین، مولكون نقلینده موستقیل اولماسینا و بو نقلین كئچمیشده اولماسینا قاییدیر. نقل حقّی اونا تعلّوق تاپمازسا، اوّلكی ذیحقّین ایذنی اولمادان، بونو نقل ائده بیلمز. بونون‌دا قاییدیشی بیعین بو شرطینه‌دیر كی بیعین موتعلّقی، مالیك طرفیندن موستقیل ساتیلا بیلن شئی اولمالیدیر. بئله اولورسا حاصیلی یوخدور (یعنی بو شرط لازیم دئییلدیر چونكی بیعین ایچینده بو مسأله وار)

ظاهیر بودور كی بو عنوان (طیلق اولماق)، وقف، رهن و امّ ولدین بیعلری‌نین جاییز اولماماسی‌نین، اونا فرع اولماسی اوچون، اؤز-اؤزلوگونده شرط دئییل. بلكه شرط، او مخصوص حقلر و آیری حقلرین اولماماسیدیر. ائله حقلر كی مالیكین تصرّوفونه مانع اولورلار مثلاً نذر، خیار و باشقالاری.

و بو عنوان (طیلق اولماق) او حقلرین قالدیریلماسیندان اله گلیب. طیلق، مالیكین اونون نقلینده اَلی تماماً آچیق اولماق و اؤز مولكونده تصرّوف ائتمگه مانع اولان حقلرین هئچ بیرینه محبوس اولماماق معناسیندادیر. قالدیریجی مفهومو (طیلق اولماق) ذیكر ائله‌مكدن مقصد، تصرّوفدن مانع اولان حقلری ذیكر ائتمگه موقدّیمه اولماق اوچوندور نه اینكی سونراكیلار اونا فرع اولان بیر شرط قویولسون. بلكه اصلی و فرعی اولماقدا ایش عكسدیر.